Friday, September 21, 2012

පොත් සවාරි යනවදෝ..



ඔන්න ඉතින් මාත් මාස ගාණක් පෙරුම් පුරලා ඊයේ පොත් සල්පිළ බලන්න ගියා. උදේ නවයට ඇතුලට ගිය අපි එළියට ආවේ හවස හයට.. හිහිහි.. කොහොමද පොත් බැලිල්ල.. ;)
මගේ චාරිකා ගැන නෙවෙයි මේ කියන්න යන්නේ.. තව යන අයගේ පහසුවට කරුණු ටිකක් කියන්න තමා හැදුවේ.

මේ සැරේ වට්ටම් වලින් වැඩිම වට්ටම් දෙන්නේ විජේසූරිය ග්‍රන්ථ කේන්ද්‍රයෙන්. 30% ක වට්ටමක් ලැබෙනවා. රත්න පොත් ප්‍රකාශයන්ගෙනුත් 30% වට්ටමක් දෙනවා. ඊට පස්සේ ගුණසේන එකේ විවිධාකාරයේ වට්ටම් තියෙනවා. 10% සිට 25% දක්වා වට්ටම් සටහන් කරලා තිබුනා. සරසවී, විදර්ෂන, සුරස, සදීපා, දයාවංශ මේ හැමතැන 20% ක වට්ටම් තමා ලැබෙන්නේ. වෙන සැර වල පොතක් පබ්ලිශ් කරපු ආයතනයෙන් ඒ පොතට විෂේශ වට්ටම් වගේ දේවල් තිබුනට මේ පාර එහෙම විෂේශයක් නැ. කොයි තැනත් එක වගේ. හොඳම දේ තමන් හොයන පොත මුලින් විජේසුරිය එකේ තියෙනවද කියලා බලලා අනිත් තැන් වලට යන එක. හැබැයි විජේසූරිය එකේ නිදහසේ බලන්න නම් පොඩ්ඩක් කලින් යන්න වෙයි. ඇතුලට ගියි ගමන් ම ඒකට ගියත් පාඩු නැ සෙනඟ වැඩි වෙන්න කලින්. ඒක තියෙන්නේ B ශාලාවේ.

අනිත් කාරණාව තමා අඩු මිලට පොත් ගන්න පුළුවන් second hand bookshops. K ශාලාවේ සම්පූර්ණයෙන්ම තියෙන්නේ එහෙම පොත් සැල්. K ශාලාව තියෙන්නේ සිරිමාවො ශාලාවට යන්න කලින් තියෙන G ශාලාවේ පැත්තකින්. ඒවගේම J ශාලාවේ දකුණු අත පැත්තට වෙන්නත් එහෙම අඩු මිලට පොත් විකුනන second hand bookshops තුනක් විතර තියෙනවා. මේ තැන් වල නම් 50% වට්ටමකට තමා පොත් අලෙවි වෙන්නේ. 

ඊට පස්සේ ප්‍රශ්නේ එන්නේ කෑම සම්බන්ධව. Food court එකෙන් කන එක ගොඩාක් ලාබ වෙයි කියලා තමා මම හිතන්නේ. එක පොඩ්ඩක් අස්සට වෙන්න තිබුනට හොයාගන්න අමාරු නැ. එතන රුපියල් 40 සිට ඉහළට කෑම තියෙනවා. තෝරාගැනීමක් තියෙනවා. රුපියල් 75කට මැගී කනවට වඩා Food court එකෙන් කන එක හොඳයි.

පුළුවන් තරම් උදෙන් යන එක තමා හොඳම. එහෙම නැත්නම් හවසට 5ට විතර යන්න ඕනේ. එතකොට සෙනඟ ගොඩාක් ගෙවල් වල යන්න පටන් අරන්. 5ට විතර ගිහින් රෑ වෙනකන් ඉන්න කොට නිවීහැනිසිල්ලේ පොත් බලන්න පුළුවන් වෙයි.

කොහොම කොහොම හරි ඔය විදිහට පොත බලලා මාත් පොත් 16ක් විතර අරගෙන ගෙදර ආවේ. රෑ 7ට අතින් කටින් එල්ලගෙන බෑග් එකත පැත්තට දාගෙන කොටුවේ බස් එකට නඟින්න යනකොට නම් ඉතින් එපා වුනා.. හිහි..ඒත් ඉතින් "අනේ මේ මගේ පොත් නේ" කියලා හිත හිත ගාට ගාට ආවා.

Tuesday, September 18, 2012

~හදිසි අනතුර~



"තමුසේ ඕකී එක්ක ගියොත් මම මැරෙනවා.. "

"ඉතින් මැරෙන්න බැරි ඕනේ එකක් කරගනින්.. මන් පුළුවන් ඉක්මනට ඩිවෝස් වෙනවා.."

හැමදාමත් වගේ එදත් සේනක ගෙදරින් එළියට බැස්සේ තරහින්. සේනකගේ කාර් එක දිහා තවත් ටිකක් වෙලා බලාගෙන හිටිය නිලූ පුළුවන් තරම් වෙර දමා දොර වැසුවේ හිතේ පුපුරන කේන්තියට දොර පළි වගේ. මහ හයියෙන් වැසුණු දොරේ ශබ්දයෙන් සේනකත් ගැස්සුණේ ය.

තරහින් පුපුරමින් නිදන කාමරයට ගිය නිලූ ඇඳ උඩ ඉඳ ගත්තේ ඇස් දෙකේ කඳුළු පුරෝගෙන. හැමදාමත් නිලූ කරන දේ තමා තනියම අඬන එක. ඇස් දෙකෙන් බේරිලා කම්මුල් දිගේ රූටගෙන වැටෙන කඳුළු පිහිදාන්නවත් ඇයට සිත් නොවුණි.. ආදරයෙන් හදා ගත්ත කූඩුව කැඩිලා විසිරිලා යන්න හදනකොට කාටද බලාගෙන ඉන්න පුළුවන්. මේ සේරම අමාලි නිසා. ඇයට හිතුණි. අමාලි සේනකගේ කලින් පෙම්වතිය. 

"සේනක අමාලිට ගොඩාක් ආදරේ කරපු බව ඇත්ත. ඒත් දැන් එයා තේරුම් ගන්න ඕනේ තමන් බැඳපු මිනිහෙක් බව. එක්කෝ මට අකමැති නම් මාව නොබැඳ ඉන්න තිබුණා." 

නිලූට එහෙම හිතුණ වාර අනන්තයි. අමාලි ආයේ සේනකගේ ජීවිතේට ආවේ සේනකවත් නිලූ වත් බලාපොරොත්තු නොවුන විදිහට. සේනකගේ කාර්යාලයේ ම වැඩ කරන්න ගත්තට පස්සේ එයලාගේ ආදරය ආයෙත් දළුලන්න ගත්තා. නිලූට සිද්ධවුනේ වෙන හැමදේම බලාගෙන අඬ අඬා ඉන්න. 

සති ගාණක් රංඩු වුන එකේ ප්‍රතිඵලය වුනේ අද සේනක එළියට බැස්සේ දික්කසාදයක් ගැන කියාගෙන. තමන්ව දික්කසාද කලොත් මොකද කරන්නේ කියලා නිලූට හිතන්න තරම් මානසිකත්වයක් තිබුනේ නැ. ඇඳ උඩ ඉඳගෙන කණ්ණාඩියෙන් තමන් දිහා බලාගෙන ඉන්න ගමන් කණ්ණාඩියේ ඉන්න රූපෙත් තමන්ට සරදමට හිනා වෙනවා කියලා නිලූට හිතුණි.. 
"නෑ.. මම එහෙම ලේසියෙන් එයාට යන්න දෙන්නේ නැ.. එයලා සෙල්ලම් කරන්නේ මගේ ජීවිතයත් එක්ක. එහෙම ලේසියෙන් එකතු වෙන්න හම්බු වෙන්නේ නැ.." සිතින් තමන්ටම එහෙම මුමුණාගත් ඈ ඇඳ උඩින් නැඟිට්ටේ නැවුම් ගැහැණියක ලෙසින්. 

මෙතෙක් වෙලා කඳුළින් පෙඟී විඩාබර වී තිබූ දෙනෙත් කෝපයෙන් දිලිසුණා. නමුත් ඒ කෝපය එසේ මේසේ එකක් නොවන බව ඇගේ බැල්මේ සටහන්ව තිබුණා. රත් පැහැ දෙනෙත් තුළ අමුතුම කාන්තියක් දක්නට ලැබුණා. නාන කාමරයේ කරාමයෙන් කඳුළු පහර මැකෙන සේ හොඳින් මුහුණ සෝදාගත් ඈ හැඳ සිටි නයිටිය ගලවා රත් පැහැ ඉරි වැටුණු ගවුමකින් සැරසුණා ය.


කුඩයත් රැගෙන දොර වසා එළියට පැමිණි ඈ තමාගේ සිතේ තිබූ සැලැස්සමේ මුල්ම පියවර ක්‍රියාත්මක කරන්නට අසල්වැසි ගෙදර විසූ මල්කා සිටීදැයි බැලීය. ඒ ලේන් එකේ කිසියම් දෙයක් ප්‍රචාරය කරන්නට නම් කිව යුත්තේ ඈට බව නිලූ අත්දැකිමෙන් දනී.
"හලෝ ගුඩ් මෝර්නින් නිලූ"
"ගුඩ් මෝර්නින්.."නිලූ තමන්ට හැර වෙන කිසිවෙකුට අව්‍යජයයි කිව නොහැකි තරම් ලස්සන සිනහවක් මවාගෙන කීය.
"ගමනක් යනවද?" මල්කාට සියල්ල දැන ගත යුතුය.
"ගමනක් ම නෙවෙයි.. සුපර් මාකට් එකට යන්න කියලා..පොඩි කෑමක් හදන්න බඩු වගයක් ගන්න ඕනේ.. අපේ මහත්තයා හරි ආසයිනේ ඔය විච්චූරණ කෑම කන්න... එයා හෙට මාව ෆිල්ම් එකක් බලන්න එක්කන් යනවා කිව්වා. එ නිසා මම එයාව පුදුම කරවන්න කෑමක් හදන්න හදන්නේ.. "
"අනේ සේනකයි ඔයායි දැක්කාම මට ඉරිසියා හිතෙනවා. ඔයලා දෙන්නා කොච්චර ආදරෙන්ද ඉන්නේ.. "
එයට පිළිතුරු වශයෙන් නිලූ කළේ සිනාවීම පමණි. තමාගේ මුල් පියවර සාර්ථක වෙන බව ඈට වැටහුණි.එය තවදුරට තහවුරු කරනු වස් තමා යමක් කිවයුතු බව ඈට සිතුණි. ඈ පෙර සිතින් කිහිපවරක් ම කිවූ වදන් පෙළ කීය.
"ඔව් අනේ.. සේනක කියන්නේ මාර හොඳ හස්බන්ඩ් කෙනෙක්. එයාත් හරි මගේ ජීවිතෙත් හරි..මන් එහෙනම් ගිහින් එන්නම්.."
"ඕකේ.."


සුපිරි වෙළඳසැලට යාමට පෙර තමාගේ සාර්ථක විවාහ දිවිය ගැන තවත් සාක්කිකරුවන් කිහිපදෙනෙක් සොයාගත යුතු බව නිලූ සිතීය. පාර අහවර වෙන තැන තිබෙන කුඩා කඩය ඊට ඉතා සුදුසු බව සිතූ ඈ එයට පිවිසුණි. කඩේ අයිතිකාරිය වයසක අම්මා කෙනෙකි. "ආහ් නෝනේ.. මොකෝ මේ උදේම?" කට පුරා සිනාසී මැගී අම්මා ඇසී ය. 
"මන් මේ සුපර් මාකට් එකට යන ගමන් මැගී අම්මේ.. බිත්තර තියෙනවද? අද අපේ මහත්තයව පුදුම කරන්න කෑමක් හදන්න යන්නේ.."
කුඩා දැරියක සේ සිනාසෙමින් නිලූ කීය.
"ඉන්න නෝනේ.. බිත්තර කීයක්ද?
"10ක් විතර දෙන්නකෝ.. එහෙනම් මැගි අම්මා 10ක් තියලා තියන්න.. මන් සුපර් මාකට් එකට ගිහින් එන ගමන් අරන් යන්න එන්නම්.."
කඩේ ඒ වනවිටත් තම පාරේ වෙසෙන කිහිපදෙනෙක්ම සිටින බවත් ඈ මනසේ සනිටුහන් කරගත්තී ඒ සැමටම සිහින් සිනා පොදකින් සංග්‍රහ කිරීමට අමතක නොකලේ තමාගේ සැලැස්මට එයත් ප්‍රයෝජනවත් වෙතැයි සිතූ නිසාවෙනි.


"සීදේවී කෙල්ල.. මහත්තයට පණ වගේ.."
මැගී අම්මා අසල සිටින්නෙකුට කියන හඬ නිලූට කඩෙන් පිටවෙනවාත් සමඟ ඇසුණි. උදෑසන තිබූ කණස්සල්ල කොහේ ගියාදෝ ඈට සිතුණි. තම සැලැස්ම පියවෙරෙන් පියවර සාර්ථක වන නිසාම ඇගේ සිතට සියුම් සතුටක් මෝදු විය.

සුපිරි වෙළඳසැලෙන් චොකලට් පවුඩර් පැකට්ටුවක්, ලොකු මාරි බිස්කට් පැකට්ටුවක්ද, නිව්ඩේල් කිරි බෝතලයක්ද ගෙන මැගී අම්මාගෙන් බිත්තර දහයද ගෙන ඈ යලි නිවසට ආවේ තම සාර්ථක විවාහ දිවිය ගැන සාක්කිකාරයන් කිහිපදෙනෙකුම සිටින බව නිශ්චිතව දැනගෙනය.

අනතුරුව මනස එකලාසයක් කරගත් ඈ සේනකගේ ප්‍රියතම අතුරුපස වන බිස්කට් පුඩිම සාදන්නට පටන් ගත්තා ය.

සවස 4.30 වනවිට සේනක ගෙදර එන බව දන්නා ඈ ඉහළ මාලයෙට ගියේ තම සැලැස්මේ දෙවෙනි පියවර සඳහා ය. 
නාන කාමරයේ තිබූ රෙදි කිහිපයක් සේදූ ඈ සබන් වතුර නාන කාමරයේ දොර අසල දැම්මා ය. එය ප්‍රමාණවත් නැතැයි සිතූ ඈ ලක්ස් සබන් කැටය වතුර කෝප්පයට දමා හොඳින් දිය කොට එයද දොර අසල වත් කලා ය. අනතුරුව අසල තිබූ සින්ක් එකේ වටේද හොඳින් සබන් දියර වත් කලා ය. අනතුරුව දොර එලියට විත් දොර අසල තිබූ තමා රෙදි සේදීමේදී ගන්නා තරමක කළු ගල තමාට කකුලින් තල්ලු කල හැකිදැයි බැලීය. සබන් දියර නිසාම එය පහසුවෙන් තල්ලු වෙන බව ඈට දැනිනි. සියල්ල අවසන් වන විට ඔරලෝසුවේ වේලාව 4.25 සටහන් වී ඇති බව ඈ දුටුවා ය.


"හෙලෝ මල්කා.. ඔයා වැඩක් ද අනේ?"
දුරකථනයෙන් මල්කා ඇමතූ නිලු තම සැලැස්මේ තෙවෙනි පියවර ක්‍රියාත්මක කලා ය.
"අනේ එහෙනම් අපේ ගෙදර එන්නකෝ.. අලුත් හින්දි ෆිල්ම් එකක් තියෙනවා. තනියම බලන්න කම්මැලි. හදපු බිස්කට් පුඩින් එකත් තියෙනවා.. මාත් කම්මැලිකමේ ඉන්නේ.."

"ආහ් එන්න එන්න.. ඔයා මොකක් හරි කර කරද හිටියේ?"
දුරකතන ඇමතුම දුන් සැනින් තම නිවසේ දොර ඉදිරියේ සිටි මල්කා දුටු නිලූ සිතින් සිනා සෙමින් ඇසීය. 
"නෑ.. මොන වැඩද.. මොකක්ද ෆිල්ම් එක? මාත් කරන්න දෙයක් නැතුව හිටියේ..
"අලුත් එකක්.. ඉන්න මම දාන්නම්.." 
නිලූ ඩිවිඩි යන්ත්‍රය ක්‍රියාත්මක කොට චිත්‍රපටය ආරම්භ කල වහාම ඈට සේනක්ගේ වාහනයේ හඬ ඇසුණි. තම සැලැස්ම බලාපොරොත්තු වූ අකාරයටම සිදු වන බව වැටහුනු ඈ තම සතුට මුහුණින් නොපෙන්වීමට වෑයම් කලා ය.
"මන් මේ මල්කාව අඬගහ ගත්තා ෆිල්ම් එක බලන්න.."
සේනකව පිළිගන්න දොර අසල යමින් නිලූ කීය. මල්කා දුටු සේනක මුහුණට සිනහවක් මවා ගත්තේ මල්කා ඉදිර්යේ නිලූ හා අමනාපව සිටිම අසල නිවෙස් සියල්ලටම ආරංචි වීම වැලැක්වීමටය. 
"ඔයාට අද විශේශ කෑමක් හැදුවා.. වොශ් එකක් දාගෙන එන්නකෝ.. "
හුරතල් ලෙස කිවූ නිලූ සේනකගේ බෑගය අතට ගත්තා. නිලූ අද වෙනස්ම විදිහකට තමා පිළිගන්නා බව දැනුනද ඒ ගැන වෙනසක් නොපෙන්වා ඔහු සාලය පසු කොට ඉහළ මාලයට ගියේ ය. ඉහළ මාලයට යාමට පඩි පෙළ ඇත්තේ සාලයත් කුස්සියත් අතරය. සාලයේ රූපවාහිනි බලන්නෙකුට පඩි පෙළ නොපෙනේ. ඒ බව දන්නා නිසාම පඩි පෙලේ ඉහළට යාමට පෙර ප්‍රශ්නාර්ථ බැල්මක් නිලූ දෙසට හෙලීමට සේනකට අවකාශය තිබුණි. 
"මන් ඔයාටයි සේනකටයි තේකක් හදගෙන එන්නම්.." මලකාට කිවූ නිලූ කුස්සිය දෙසට ගියා යා.
තේ පෝච්චියට තේ කුඩු දමා, කේතලය ලිප තැබූ සාලයේ රූපවාහිනේ බෙරිහන් දෙන හින්දි ගායිකාවගේ හඬ නිවසේ සියලු ශබ්ද යටපත් කරවීමට සමත්දැයි සිතී ය. තම සැලැස්ම සාර්ථක වුවහොත් තව ටික වේලවකින් සිදු වන දෙය සිහි වූ ඈට චකිතයක් නොදැනුනා ම නොවේ. තවත් විනාඩි කිහිපයක් කුස්සියේ සිටි ඈ හොරෙන් ඉහල මාලයට ගියා යා. 

ඒ වන විට සේනක තුවාල පමණක් හැඳ නාන කාමරයට යාමට සුදානම් සිටියේ ය. ඔහුට නොදැනෙන ලෙස ඔහු අසලට ගිය ඈ නාන කාමරයෙ දොර අසලදී ඔහු පිටු පසින් තල්ලු කලා යා. බලාපොරොත්තු නොවූ තල්ලු නිසා තම සමබරතාව නැතිව ගිය සේනක සබන් වතුර පිරි නාන කමරයට අඩිය තැබුවේ ය. සබන් වතුර නිසාම පය ලිස්සූ ඔහු සින්ක් එකේ දාරය අල්ලා ගැනීමට උත්සහ කලේය. නමුත් නැවත වරක් සබන් වතුර ඔහුට සරදම් කලේ ය. අත ලිස්සු ඔහු උඩුබැලි අතට වැටුනි. ඔහු වැටෙන අයුරු බලා සිටි නිලූ සැනින් දොර අසල තිබූ කළු ගල කකුලින් ඔහුගේ හිට යටට තල්ලු කලා ය. උඩු බැලි අතට වැටුනු සේනකගේ හිස තදින් කලු ගලේ රළු පෘෂ්ටය මත වැදුණි. ටිකක් වෙලා අහපසුවෙන් ඇසි පිය ගැසූ සේනකගේ ඇසි පිය ගැසීම නතර විය. කලු ගල දිගේ රත් පැහැ යමක් ගලා එන අන්දම නිලූ බලා සිටියා ය. මේ සියල්ල මිනිත්තු කිහිපයක් තුළ අවසන් විය. තවමත් ඈට හින්දි ගායිකාව මරහඬ දෙනවා ඇසුණි. ඒ සැණින් යලිත් හැරී කුස්සියට ආ ඇය කුස්සියේ හඬ නගමින් තිබූ කේතලය නිවා වතුර තේ පෝච්චියට දැම්මා ය. සේනකගේ කෝප්පයටත් තවත් අඩු කෝප්පයකටත් තේ වත් කල ඈ හොඳින් සීනි දමා කවලම් කළාය. අනතුරු තේ දෙකම අතින් ගෙන හෙමිට සාලය දෙසට ගියා ය. මල්කා රූපවාහිනි තිරය මත දෑස් අලවා බලා සිටින අයුරු දුටු ඈට සිනහ පහල විය. 

"සද්දේ වැඩි වගේ නේ.. ඉන්න පොඩ්ඩක් අඩු කරමු.. " තේ එක මල්කා අතට දුන් නිලු ශබ්දය මදක් අඩු කොට..
"මන් සේනකට තේ එක දිලා එන්නම්.." කියා උඩු මහලට ගියා ය.

මද වෙලාවකින් මල්කාට ඇසුනේ චිත්‍රපටයේ මහ හඬ නොවේ.එ නිලූගේ ය. ඒ මර හඬ අසල නිවෙස් වලට ඇසුණාට සැක නැත. මල්කා වේගයෙන් උඩු මහලට දුවගෙන ගියා ය. සේනකගේ කෝප්පය කාමරය මැද බිම වැටී කැලී විසිරී තිබුණි. නාන කාමරයේ ඇරුනු දොරින් නිලූ දණ ගසා ගෙන මරලතෝනි දෙන බව මල්කා දුටුවා ය. සේනක බිම වැටී සිටින අන්දමත් ඔහු වටා රතු පලසක් මෙන් රුධිරය ගලා ගොස් ඇති අන්දමත් දුටු මල්කාට කෑගැසුණි. ගැහැනුන් දෙදෙනාගේ කෑගැසීමට යාබද නිවසේ සිටි නිමල් දිව ආවේ ය. 
සේනකව රෝහලකට ගෙන යා යුතු බව ඔහුට වැටහුණි. බලෙන් මෙන් නිලූව ඇද පසෙකට කළ ඔහු සේනකව ඔසවා ගන්නට උත්සහ කලේ ය. ඒ වනවිටත් අසල්වැසියන් කිහිපදෙනෙකුම පැමිණ සිටි නිසා  සේනකව දෙතුන් දෙනෙක් එකතු වී ඔසවා ගත්තෝ ය. සේනකගෙන් වැඟිරී තිබූ රුධිරය දුටු නිලූ යලිත් වරක් මහ හඬින් කෑගැසීය. 

"ඔය ලේ ටිකට වතුර ටිකක් ගහන්න.. මේ ළමයා ලේ දැකලා බය වෙලා.."

වැඩිහිටි කෙනෙක් කියනවා නිලූට ඇසුණි. ඒ සැණිනි තරුණ කොල්ලෙක් නාන කාමරයේ දොර අසලම හිඳ අත දිගු කොට දොර පැත්තේම තිබූ ටෙලිෆෝන් ශවර් එක ගෙන මුලු බිම පුරාම වතුර ඉහින්නට විය. රුධිරයත් සමඟ සබන් වතුර හේදී යන අයුරු නිලූ බලා සිටියා ය. සේනකව ඔසව ගත් පිරිස ඒ වනවිටත් ඔහුව අසල වෑන් රියක දමාගෙන රෝහලට යාමට පිටත් වී හමාරය. 

"මගේ මැණික එක්ක මටත් යන්න ඕනේ.. මගේ මැණික මාවත් එක්ක යන්ඩෝ.."
නිලූ මරලතෝනී දීගෙන පඩි පෙළ දිගේ පහළට දිව්වා ය. කිහිපදෙනෙක් ඈව අල්ලා ගත්තෝය. අනතුරුව ඈවත් නඟ්ගවා ගත් තවත් වෑන් රියක් රෝහල බලා පිටත් විය. 

සේනකව කෙලින්ම මෝචර වෙත් ගෙන ගොස් තිබුනි. මෝචරිය ලඟ බිම හැපී හැපී නිලූ වැලපෙන්නට ගත්තා ය. සති ගාණක් හිර කරගෙන හිටිය වේදනාව එළියට ආ බවක් ඈට සිතුණි. ඈ හැඬුවේ බොරුවට නොවේ. හද කකියන බව ඈට දැනුනි. ඈ සියලු වේදනාව පිට කරන්නට මෙන් හැඬුවා ය. රෝහලේ බොහෝ දෙනෙකුට ඇගේ හැඬුම බලා සිටිය නොහැකි විය. ඔවුන්ගේද නෙත් තෙත් වුයේ නොදැනී මය. 

හිසට සිදුවූ දරුණු තුවාලයෙන් අධික ලෙස රුධිරය වාහනය වීම නිසා සේනකගේ මරණය සිදු වූ බවත් එය හදිසි අනතුරක් ලෙසත් පශ්චාත් මරණ වාර්ථාවේ සඳහන් විය. 

මළ ගෙදර ආ සියල්ලෝම නිලූව දැක කම්පා විය. නමුත් ඒ කිසිවෙකු කාන්තියෙන් දිදුලන නිලූගේ දෙනෙත් දුටවාදැයි සැකය.

"ආදරයත් වෛරයත් වෙන් වෙන්නේ නූල් පොටකිනි."

Monday, September 17, 2012

බාබායිගා ආච්චි වෙත ආදරයෙන් ලියමි




බාබයිගා ආච්චි,
ලස්සන වසීලිස්සා බාරේ,
කුකුල් කකුල උඩ ගෙදර,
අඳුරු කැලෑව,
රැසියාව.
සෙත් වේවා..!!!


ආදරණීය බාබායිගා ආච්චියේ,

කොහොමද ඉතින් සැප දුක්? ආච්චි දැන් හොඳටම ලෙඩ වෙලාලු නේද.. මට වසීලිස්සා කිව්වා දැන් ආච්චිට කන්න කියලා දෙයක් වත් කැලෑවේ නැ කියලා..අච්චිට රුසියන්කාරයෝම කාලා එපා වෙලා ඇති නේද? මට වසීලිස්සා ඔය ගැන කියද්දී ආච්චි ගැන දුක හිතිලා කඳුළු සට සට ගාලා වැටෙන්න ගත්තා. සත්තයි.. ඒ නිසාම තමා ආච්චිට මේ ලියුම ලියන්න හිතුවේ. 

ආච්චියේ මෙහෙ ඉන්නවා හොඳ මස් පර්වත දෙකක්. ඒ දෙන්නා කෑවොත් නම් ආච්චිට ටක්කෙට සනීප වෙනවා. වෙන මුකුත් හින්ද නෙවෙයි උන් කාලා තියෙන ජාති හින්දා.  ඉතින් මේ දෙන්නා ව ආච්චි කෑවොත් එයලා කලා තියෙන ඒවාත් ආච්චිගේ බඩටනේ. හරියට ඒක සර්පයා ගෙම්බව කනවා, උකුස්සා සර්පයාව කනවා වගේ. එතකොට ගෙම්බත් උකුස්සගෙ බඩේ. 

නිකන් හිතන්න ආච්චිට දැන ඉගෙන ගන්න වයසත් පැනලා තියෙන එකේ අධ්‍යාපන ලබා ගන්න විදිහක් නැනේ. ඒ නිසා මෙහෙ අධ්‍යාපනයි, උසස් අධ්‍යාපනයයි කියලා ජාති දෙක කාපු මේ දෙන්නව ආච්චි කන්න. ඔය කියපු ජාති දෙක මහා ගොඩාක් වටිනවලු නොවැ. ආච්චි ආච්චිගේ වංගෙඩිය උඩ නැඟලා මොල් ගහෙන් කොට කොට අහසින් ඇවිල්ලා මේ දෙන්නව එක පාරට ගිලලා දාන්න. හැබැයි ඕන් එක පාර ගිලින්න ඕනේ හොඳේ. නැත්නම් දෙන්නා එක්ක ආච්චිව ගිලිද දන්නේ නැ. ඒකත් කරන්න බැරිකමක් නැ මේ දෙන්නට. 



අනේ බුදු ආච්චියේ ආච්චි ලබන ආත්මේ යකින්නියක් වෙලා නෙවෙයි ලස්සන කුමාරිකාවක් වෙලා ඉපදෙනවා මේ දෙන්නව අනුභව කරන්න පුළුවන් නම්. සත්තකින් ම..

එහෙනම් මගේ සුදු ආච්චි වහාම මෙහෙ ඇවිල්ලා මුන් දෙන්නව ගිලින්න හොඳේ. මම නවතිමි.

මීට 
ඔබේ දයාබර
රතු හැට්ටකාරි.

ප.ලි ලියුම බලලා පුච්චලා දාපන් ආච්චියේ. නැත්නම් මුන් දෙන්නා මාව කන්න එයි.


Sunday, September 16, 2012

~නොනිදන රැය~


"Lovely Kiss by Leonid Afremov"

මල් පෙති ගිලිහෙනා විට එකිනෙක තඹර
නින්දට වැටෙන විට මත් වූ කැල බඹර
දියත ම වසාගෙන පැතිරෙන විට අඳුර
නුඹ ඒ මවෙත දුල කරමින් සිත් අඹර

තුරුවැල් නැලවේවී වැද නුඹගේ සුසුම
දිවි තොර වේද දැක නුඹ රූ කොඳ කුසුම
හැම මල් සුවඳ පරදයි නුඹගේ පුසුඹ
සතුටකි සැනසුමකි මට නුඹ හා විසුම

නුඹගේ දෙපා මුල සත් මහ දෙව් සැපත
නුඹගේ සිසිලසින් මා හද ගිම් නිවෙත
නුඹ රූ දෙනයනට අමයුරු පැන් ගෙනෙත
රැජිණිය නුඹ ම වේ දැහැනේ සිල් බිඳෙත

අඳුරු සළුව විසිරේ නුබ සයන පුරා
මුතු පොට කැඩී නුඹ වට කර සිටින නුරා
දෙනයන කැල්ම විහිදේ නුඹේ සුවඳ උරා
මත් බිඟු මම වෙමි නොනිදන මෙරැය පුරා


මේ මම 2008දී ලියපු එකක්. උසස් පෙළ කේවල් ව්‍යාපෘතිය විදිහට මම කළේ කවි සංග්‍රහයක්. පොත් රාක්කේ අස් කරනකොට ඒ පොත ආයේ හම්බු වුනා.

Tuesday, September 4, 2012

ඔබත් අනවශ්‍ය ලෙස දරුවන්ගේ ජීවිත වලට බලපෑම් කරන අයෙක්ද??


මේ මාතෘකාවට අදාළව ලිපියක් පළ කරන්නට බොහෝ කලක සිට සිතාගෙන සිටියද ඊට නිසි අදහසක් මා තුළ නොතිබුණි. ඊට හේතුව මා තවමත් දෙමව්පියන් යන භූමිකාව රඟ පා නැති වීමත් දෙමාපිය දූදරු සම්බන්ධය දෙමාපිය කෝණයෙන් කෙසේද යන්න මා නොදැන සීටිමත් ය. නමුත් අවුරුදු 22 ක ජීවිත කාලය තුළ [මහ ලොකු කාලයක් නෙවෙයි] අහලා දැකලා අත්විඳලා තියෙන දේවල් දිහා බැලුවාම මටත් පොඩි පොඩි දේවල් ටිකක් කියන්න පුළුවන් වෙයි දෙමාපිය දූදරු සම්බන්ධය ගැන. ඔබත් ඔබේ දරුවාගේ ජීවිතයට අනවශ්‍ය ලෙස බලපෑම් කරනවාද?? එහෙනම් මේ ලිපිය ඔබට සිතන්නට යමක් ඉතුරු කරාවි යන්න මගේ විශ්වාසයයි. මෙය ඔබ තරුණ ගැහැණු ළමයෙක්ගේ නන්දෙඩවීමක් ලෙස දකින්නට ඉඩ ඇත. දරුවකු හැදීම ගැන කිසිත් නොදන්නා අත්දැකීම් රහිත ප්‍රකාශයන් සහිත ලිපියක් ලෙස දැකීමට ඉඩ ඇත. ඔව්. මා එකඟයි. මා දරුවකු බිහි කර නැත. කවා පොවා හදා වඩා නැත. නමුත් මා මගේ නිවස තුළින් උගත් දේ නම් දෙමව්පියන් දරුවා බිහි කළද ඔහු තමාගේම කියා ජීවිතයක් තිබෙන තවත් එක මනුෂ්‍ය ප්‍රාණියෙකි. දරුවාට අසීමාන්තික නිදහසක් ලබා දීමක් ගැන මා කතා කරන්නේ නැත. නමුත් මේ ඔබ ඔහුගේ/ඇයගේ ජීවිතටට අනවශ්‍ය ලෙස බලපෑම් කලහොත් ඇති විය හැකි ප්‍රතිඵලය ගැන ලීවීමට දරන තැතකි. මා වැරදි වීමට ඉඩ ඇත. නමුත් අවම වශයෙන් සිද්ධීන් දහයකගෙන් නවයක ප්‍රතිඵලය මෙය වීමට ඉඩ ඇත.


මේ ප්‍රශ්න වලට පිළිතුරු මට අවශ්‍ය නැත. ඔබේ හදවතට පිළිතුරු දෙන්න.
[මේ ලිපියෙන් අරමුණු කරන්නේ ගැටවර වියේ [Teenage] පසුවන හා ගැටවර විය පසුකළ දරුවන් ය. ගැටවර විය පසු කොටත් [above 19] තාමත් ඔබ ඔබේ දරුවාගේ ජීවිතය පාලනය කරනවා නම් එය තරමක් හාස්‍යයට කරුණක්. නමුත් එය සිදු වෙනවා.]

1. ඔබ ඔබේ දරුවාට ආදරය කරනවාද?
2. ඔබට ඔබේ දරුවා සතුටින් සිටීමට අවශ්‍යද?
3. ඔබේ දරුවාට ගැලපෙන සුදුසුම දේ "ඔබ දන්නවා" කියා සිතනවාද?
4. ඔබේ දරුවාට පෞද්ගලිකත්වයක් තිබේද?
5. ඔබ ඔහුගේ/ඇයගේ මතයට ගරු කරනවාද?
6. ඔබේ දරුවාට නිවස තුළදී ස්වකැමැත්ත [Free will] ක්‍රියාවට නැංවීමට හැකිද?
7. ඔහු/ඇය විරුද්ධ ලිංගික යහළුවන් ඇසුරු කිරීම ගැන ඔබ නිකරුනේ කලබල වෙනවාද?
8. ඔබේ දරුවාගේ දිනපොත ඔබ කියවනවාද?
9. ඔබ ඔවුන් බිහි කළ නිසා ඔවුන් ඔබේ සිහිනයන් සැබෑ කළ යුතු යැයි ඔබ සිතනවාද?
10. ඔබ ඔබේ දරුවාට මිතුරෙක්ද?


හොඳින් සිතන්න. ඔබ දන්නවා නිවැරදි පිළිතුරු. 1. ඔව් 2. ඔව්. 3. නැහැ. 4. ඔව් 5. ඔව් 6. ඔව් 7. නැහැ 8. නැහැ 9. නැහැ 10. ඔව්.

ඒවා ඔබේ පිළිතුරු නම් ඔබට කියවීම නැවැත්වීමට හැකිය. ඔබගේ දරුවන් ඉතාමත් වාසනාවන්තය ඔබ වැනි දෙමව්පියන් ලැබීමට.

ඒවා ඔබේ පිළිතුරු නොවී නම් ඔබ ඉතිරිය කියවා බලන්න. සිතන්නට යමක් ඔබට ලැබේවී.
නිසැකයෙන් ම දෙමව්පියන් යන නාමය සුදුසු නැති කිහිපදෙනෙකු හැරෙන්නට අනිත් හැම අයෙක්ම පළමු ප්‍රශ්න දෙකට දෙන පිළිතුර "ඔව්" විය යුතු ය. [අවාසනාවට අතරින් පතර 'නැහැ' කියන පිළිතුර දෙන අයත් අපේ සමාජයේ සිටිනවා]

නමුත් අනිත් ප්‍රශ්න?

අපි ආරම්භ කරමු තුන්වන ප්‍රශ්නයෙන්. ඔබ ඔහුට/ඇයට ගැලපෙන සුදුසුම දේ දන්නවා යැයි සිතන්නේ නම් ඔබ වැරදි මිත්‍රයා. මිනිසුන් විවිධාකාරය. ඔහු/ඇය ඔබේ ජාන වලින් සැදුනු ඔබේ දරුවා වුවත් ඔහු/ඇය ඔබට වඩා වෙනස්. ලොව  සිටින අන් සියල්ලන්ටම වඩා වෙනස්. එනම් අතේ ඇඟිලි එකම අතකට අයිති වුනත් එකිනෙකට වෙනස් සේ ඔවුන්ගේ සිතුම් පැතුම් අන් අයට වඩා වෙනස් ය. ඔබ ලොව තිබෙන හොඳම දේ දන්නවා විය හැකිය. නමුත් ඔබ ඔහුට/ඇයට සුදුසුම දේ දන්නේ නැත. එය දන්නේ ඔහු/ඇය පමණි. ඔබට කළ හැකි හොඳම දෙය නම් ඔහුට/ඇයට ඇති හොඳම තෝරා ගැනීම් පෙන්වන්න. යාමට මාවත් පෙන්වන්න. ඔහුගේ/ඇයගේ කැමැත්ත අනුව එය තෝරා ගැනීමට ඉඩ හරින්න. එය ඔබේ හොඳම තේරීම නොවෙන්න පුළුවනි. නමුත් එය ඇයගේ/ඔහුගේ හොඳ තේරීමයි.

අංක හතරට ඔබේ පිළිතුර 'නැහැ' නම් එය ඔබ ඔබේ ජීවිතයේ කරන විශාලම වැරද්ද විය හැකිය. පෞද්ගලිකත්වය යනු කෙනෙක් ගේ පෞර්ෂය වර්ධනය කරන වැදගත් ම කරුණ කි. බිඳුණු පෞර්ෂයක් සමඟ ඔහු/ඇය සමජය තුළ සාර්ථක නොවේවි. කොතරම් ඉහළ අධ්‍යාපන සුදුසුකම් තිබුනද ශක්තිමත් පෞර්ෂයක් නැතිනම් සමාජයේ සාර්ථක වීම අපහසුය. ඔහුට/ඇයට තම යහළුවෙක් දුරකථන ඇමතුමක් දීමට පවා ඔබගෙන් අවසර ගැනීමට සිදුවෙනවා නම්? යහළුවන් සමඟ විනෝද වීමට යාමට නොහැකි නම්? [යන තැන ඇසිය යුතුය. කා සමඟද ඇසිය යුතුය. විශේශයෙන්ම ගහැණු ළමයින්ට ඒ අවධානය ලැබිය යුතුය.] මෙවැනි සුළු සුළු දෑ වලින් ඔබ ඔහුව/ඇවය ආරක්ෂා කරනවා නොව ඔවුන්ව බිඳ වට්ටනවා. එය සිදු වෙන්නේ ඔබ සිතන ආකාරය නොවේ. යහළුවන් අතර කොන් වීම, යහළුවන් ඔහුට/ඇයට පිටුපසට සිනා සීම. මෙවැනි දේ විදු වේ. එය ඔබේ දරුවාගේ පෞර්ෂත්වයට හානියකි. ඔහුට තාමාගේ කියා කාමරයක් නැති නම්? ඔහුගේ/ඇයගේ කාමරයට දොරක් නැති නම්? හැම මිනිසෙක්ටම යම්තරමක පෞද්ගලිකත්වයක් තිබිය යුතු ය. එයින් අදහස් වෙන්නේ ඔබ ඔහු/ඇය ගැන සොයා නොබැලිය යුතු බව නොවේ. සොයා බලන්න. යම් සීමාවක් ඇතිව. ඔහුට/ඇයට ඒ නිසි පෞද්ගලිකත්වය ලබා දෙන්න.

අංක 5 හා 6 බොහෝ විට එකට සම්බන්ධයි. ඔබ ඔහුගේ/ඇයගේ මතයට හරි කරනවාද?? ස්වතන්ත්‍රභාවය ඔබගේ නිවස තුළදී ඔහුට/ඇයට හිමිද? නීතියෙන් හැම අයෙකුටම හිමිව ඇති නිදහස් තීර්ණ ගැනීමේ හැකියාව ඔබේ දරුවාටත් තිබේද? එහෙම නැත්නම් කළ යුතු දේ ඔබ ඔහුට/ඇයට කියවාද? ඔහු/ඇය හොඳ රූකඩයක් වේවි. ඔබ නැති දවසක සමාජය තුළ ඔහු/ඇය අතරමං වේවි. ඔබ ඔහුගේ/ඇයගේ නිදහස් තීර්ණ ගැනීමේ හැකියාව කපා වෙන් කල පසු එය යළි කිසිදිනක නැවත සැකසීමට නොහැක. ඊට හේතුව ඔවුන් ඊට පුරුදු වී නැති වීම ය. තනිවම තීරණයක් ගන්න වූ අවස්ථාවක ඔවුන් ජීවිතේ අතරමං වේවි. සමජයගේ පහසු ගොදුරු බවට පත් වේවි. නිදහස්ව තීරණ ගැනීමට ඔවුන්ට ඉඩ දෙන්න. ඒ තීරණ නිවැරදිව අධීක්ෂණය කරන්න. එය ඔබේ දරුවව ශක්තිමත් කරාවි.

අංක 7ට අදාළ කරුණ ගැන ඔබ කලබල වෙනවා නම් කාරණා දෙකක් සිදු විය හැකිය. එකක් ඔවුන් විරුද්ධ ලිංගිකයන් ඇසුරු කිරීමට බිය වීම හා පුරුදු නැති කම නිසා අනවශ්‍ය ලෙස ලැජ්ජාශීලී වීම. අනිත් කරුණ නම් ඔබට හොරෙන් ඔවුන් ඇසුරු කිරීමට මාර්ගයක් සකස් කර ගැනීම. මේ කරුණු දෙකින් ම සිදු වන්නේ හොඳක් නොවේ. විශේෂයෙන් පිරිමි ළමයෙකු ගැහැණු ළමයි ඉදිරියේ අනවශ්‍ය ලෙස ලැජ්ජා වෙනවා නම් හෝ නුහුරු ලෙස හැසිරෙනවා නම් එය ඔහුගේ පෞර්ෂයට විශාල ලෙස බලපෑම් ඇති කරනවන්නකි. අනිත් කරුණ ගැහැනු ළමයෙකු තම මා පියන්ට හොරා පිරිමි ඇසුරට යොමු වෙනවා නම් එයද අනතුරකට අත වැනීමකි. ඊට පිළියම ඔවුන් එක්ටැම් ගෙයක සිර කරවීම නොවේ. ඔවුන්ට නිසි සීමාවක සිට විරුද්ධ ලිංගිකයන් ඇසුරු කිරීමට ඉඩ ලබා දෙන්න. ඔවුන්ව අනවශ්‍ය ලෙස සැක කිරීමෙන් වළකින්න. 

අංක 8 ට ඔබ ඔව් කිවා නම් එය ලැජ්ජාවට කරුණකි. එය ඉතා නරක පුරුද්දකි. ඔවුන්ට ඔවුන්ගේ ප්‍රශ්න ඇත. ඒවා දැන ගැනීමට සුදුසුම ක්‍රමය ඔහුගේ/ඇයගේ දිනපොත කියවීම නොවේ. ඔවුන්ට සවන්දීමයි. ඕනැම ප්‍රශ්නයක්දී තමාට කතා කළ හැකි බව ඔවුන්ට දැනෙන පරිසරයක් ගොඩ නැඟීමයි.

අංක 9 සඳහන් ලෙස ඔබ ඔබේ සිහිනය ඔහු තුළින් ඉටුකරවා ගැනීමට යනවා නම් එය අසාධාරණය. මව්පියන් ලෙස එසේ සිතීමට ඔබට සියළු නිදහස ඇත. නමුත් මොහොතක් සිතන්න, එවිට ඔහුගේ/ඇයගේ සිහිනයට වන්නේ සිත තුළම මියැදෙන්නටය. දරුවා සතුටු වන්නේ ඔහුගේ/ඇයගේ සිහිනය සෑබෑ වන විටදීය. එසේ අයෙක් ජීවිතේ තෘප්තිමත් වන්නේ තමා කැමති දෙයක් කරන විටදී ය. සමහර විට ඔබේ සිහිනය ඔහුගේ සිහින නොවෙන බැවින් ඔබ ඔහුගේ ජිවිතය නීරස එකක් කරනවා විය හැකිය. 

අවසානයෙන් ඔබ තවමත් ඔබේ දරුවාට දෙමව්පියෙක් පමණක් නම් එය වෙනස් කිරීමට කාලයයි. යහළුවකු වන්න. ඕනැම රහසක් තමා සමඟ බෙදා ගත හැකි බව ඔවුන්ට ඒත්තු ගන්වන්න. රහසක් කීවූ විට කලබල නොවී ඊට ගැලපෙන උපදෙස දෙන්න. මගේ අම්මාට මට ඕනෑම දෙයක් කීමට හැකි වීම ගැන මම ආඩම්බර වෙනවා. ඔබේ දරුවා ඔබට හැමදේම කියන අයෙක් වූ විට ඔබට ඔහු/ඇය ගැන බිය වීමට කරුණක් නැත. මක් නිසාද යත් ඔහු/ඇය ඔබට කීමට නොහැකි දෙයක් කීරීමට නොසිතන බැවිනි. ඔවුන් තමා විසින්ම වරදින් වැළකෙන්න බව මම අත්දැකීමෙන් දනිමි.


අයෙක් රූකඩයක්ද තව අයෙක් දරුණු පුද්ගලයෙක්ද විය හැකිය. මා දන්නා සමහරුන් තම දෙමව්පියන්ට ආදරය නොකරයි. තමාට කවදා ඔවුන්ගේන් ගැලවී යා හැකිදැයි බලා සිටි. මෙවැනි තත්වයක් ඔබට අවශ්‍ය නැති බව ස්ථිරය.
ඔබ දරුවාට ආදරේ නම්
ඔහුට නිසි මඟ පෙන්වන්න, ඇඳගෙන යන්න එපා
ඔහුට විකල්ප පෙන්වන්න, තල්ලු කරන්න එපා
ඔහුට ගෞරවය දක්වන්න, හෑල්ලු කරන්න එපා
ඔහුට ආදරය කරන්න, හිර කරන්න එපා..


To read the English post to go to this Link